باسقى بەت / عيبادات / كەلەستەگى ءبىر كۇن

كەلەستەگى ءبىر كۇن

ەرەجەپ ايىنىڭ 27-كۇنى  (2017ج.23-ءساۋىر), ميعراج ءتۇنىنىڭ قارساڭىندا، «ەشان باۋ» دەگەن  ەسكى اتى ەستەن شىققان،قازىر «ورازاتا» اتالاتىن  اۋىلداعى  كوگالدى  القاپتا،سارىاعاش اۋداندىق اكىمدىگى قولداۋىمەن  ەتجەمەس ەشان اتانىڭ اتىنا دەربىسانا  ۇيىمداستىرىلدى. 19 – عاسىردىڭ سوڭى مەن 20-عاسىردىڭ باسىندا، 50 جىلداي   كەلەس  وڭىرىنە ءدىني ساۋاتتىلىقتىڭ، ەگىنشىلىك مادەنيەتىنىڭ  «ۇرىعىن» سەپكەن  اۋليە—ەت جەمەس ەشان اتانىڭ اتىنان  اشىق اسپان استىندا، مىڭنان استام ادام قاتىسقان،وسىنداي  ءدىني شارا  العاش رەت  ءوتتى.

 

بۇكىل تۇرىك الەمىنىڭ ءپىرى سانالعان  قوجا احمەت ءياسساۋيدىڭ  جولىن ۇستانىپ، ءوزى تاڭداعان سوپىلىقتىڭ شىڭىنا جەتۋ بارىسىندا شاريعات، تاريقات، ماعريپات ىلىمدەرىن تەرەڭ مەڭگەرۋىنىڭ ارقاسىندا اللانىڭ مەيىر،شاپاعاتىنا بولەنىپ، الەم جاراتىلىسىنىڭ اقيقاتىنا كوز جەتكىزگەن  ەت جەمەس ەشان اتا باسقالاردىڭ  پايىمى جەتە بەرمەيتىن قاسيەتتەرگە يە بولدى،اۋليە اتاندى. جىل سايىن كوكتەم شىعا،ناۋرىزدا باستالعان  جاڭا جىلدىڭ ەلگە جايلى، حالىققا بەرەكەلى جىل بولۋىن ءبىر اللادان سۇراپ  دەربىسانا وتكىزەتىن. سوڭعى   جىلدارداعى قمدب-ءنىڭ  كوكتەمدە كوپشىلىك بولىپ، مازار تازالاۋدى  «دەربىسانا» دەپ اتاعانى ءساتتى شەشىم بولدى. جۇمىس اياقتالعان سوڭ،داستارحان جايىپ،قۇران وقىپ،دۇعا-تىلەك جاساۋ  اتا-بابا داستۇرىنە  ساي كەلىپ تۇر. وسىلايشا  بۇل شارا حالىق قولداعان،جالعاستىرعان  باستاماعا  اينالدى.

اۋدان  اكىمى  قايرات ابدۋاليەۆ  كىرىسپە ءسوز سويلەپ  جيىندى  اشتى. جيىن بارىسىندا  قمدب-نىڭ سارىاعاش  اۋداندىق    بولىمشەسىنىڭ يمامى  بەرىك  قالداروۆ،  «ەشان بابا» جانە  «ەشان باۋ»  مەشىتتەرىنىڭ  يمامدارى   ايدار  سادىقوۆ  پەن بولات  تاجىباەۆتار   وتكەن ارۋاقتارعا  ارناپ قۇران باعىشتادى. مىنبەرگە كوتەرىلگەن   اۋداندىق ارداگەرلەر كەڭەسىنىڭ توراعاسى  مۇستافا  سۇلەيمەنوۆ، اۋليەلەر تاريحىن زەرتتەپ جۇرگەن  بەلگىلى  عالىم  سەيىتومار ساتتاروۆ، پروفەسسور  ش.ءجانادىلوۆ جانە وسى جولداردىڭ اۆتورى   ەلباسىمىز  ن.نازارباەۆتىڭ  جۋىردا جارىق كورگەن  «بولاشاققا باعدار: رۋحاني جاڭعىرۋ» ماقالاسىندا  تاريحي جانە  رۋحاني  بايلىعىمىزدى  ساقتاي وتىرىپ، ونى ارتتىرۋ، سانانى جاڭعىرتۋ قاجەتتىلىگى  تۋرالى  جازعاندارىن  جانە جۋىردا  ءدىن باسىلارىمەن بولعان كەزدەسۋىندە  ەلىمىزدى جىمىسقى  سىرتقى  جاۋلاردان قورعاۋعا قاتىستى باعىت-باعدار بەرگەن  سوزدەرىن قولداعان   حالىقتىڭ  ەرىكتى تۇردە باس قوسقان  جيىنى ەكەنىن ءوز سوزدەرىنە  قوسىپ  ايتتى.

دەربىسانانىڭ باعدارلاماسى  ءماۋلىت مەرەكەسىنىڭ ۇلگىسىمەن جاسالدى. الدىمەن  جاقسىۇمبەت  ورازايۇلى  ياسساۋيدىڭ  حيكمەتتەرى مەن زىكىرلەرىن  قوبىزدىڭ  سۇيەمەلدەۋى مەن   ورىنداپ  ەسىتتىردى. اۋدانىمىزداعى«ارۋانا»،«ءحانبيبى»، «اق اجەلەر»  انسامبىلدەرى، اباي اۋىلىنداعى  مادەنيەت ءۇيىنىڭ  ۇجىمى، «كەلەس» ۆوكالدى اسپاپتار ءانسامبىلى  بەلسەنە قاتىستى. «كەلەس» حالىق تەاترىنىڭ  ءارتىس-انشىلەرى  باقىت  پوشانوۆ پەن  گۇلاينا سۇلتانوۆالار ەت جەمەس ەشان اتاعا ارنالعان  جولبارىس مايلىقوجاۇلىنىڭ جانە كەندەباي مۇرتازاەۆتىڭ ولەڭدەرىن تەرمە اۋەنىمەن ورىندادى.

الماتىدان   كەلگەن ەلىمىزگە كەڭىنەن تانىمال، يللاحي اندەردى ورىنداۋدىڭ  شەبەرى، جەرلەسىمىز سەرجانالى  ورىنباسارۇلى  الىبەكوۆ ارنايى باعدارلامامەن  ساحناعا شىعىپ، اللانى ماداقتاعان،مۇحاممەد  پايعامبارىمىزعا سالاۋات ايتقان ءدىني اندەرىمەن  مۇسىلمان  قاۋىمنىڭ   قۇلاق قۇرىشىن قاندىردى. يمامداردىڭ  ۋاعىز-ناسيحاتىن  ولەڭ  مەن  ءدىني   اسەم  اۋەنگە اينالعان نۇسقاسىن ەستىگەندە كوزدەرىنە جاس  تولعاندار  از بولمادى.

اۋليە  اتامىزدىڭ  شوبەرەسى  حاسان قوجا، وسىدان 120 جىلداي بۇرىن  ەت جەمەس ەشان اتا كيىپ جۇرگەن شاپاندى ءانشى سەرجانالىگە  كيگىزىپ، ەلگە كورسەتتى.  دەربىسانادا  ونشاقتى  توي  قازاندارى  اسىلدى، كوپشىلىككە ارنالىپ داستارحان جايىلدى.

 

وڭعار  يساەۆ، جۋرناليست    كەلەس ءوڭىرى سارىاعاش اۋدانى وڭتۇستىك قازاقستان وبلىسى.

 

 

 

 

 

سونداي-اق، وقىڭىز

«اپپاق يشان – رۋحانيات الەمىنىڭ دارابوزى!»

وسىدان ءۇش جىل بۇرىن «اپپاق يشان — رۋحانيات الەمىنىڭ دارابوزى!» دەگەن تاقىرىپتا بايدىبەك اۋدانىنىڭ ورتالىعى …

پىكىر قالدىرۋ

ە-پوشتا مەكەنجايىڭىز جاريالانبايدى. مىندەتتى ورىستەر * تاڭبالانعان