باسقى بەت / ءبىر سۋرەتتىڭ سىرى / جانى ءجانناتتا بولعاي

جانى ءجانناتتا بولعاي

وڭتۇستىك قازاقستاننىڭ ابىزى، سوعىس جانە ەڭبەك ارداگەرى ءادىھام شىلتەرحانوۆ اتامىز دۇنيەدەن ءوتتى. 4 قاڭتار كۇنى جانازاسى بولدى. ەل بولىپ ۇلدارى مەن جاقىندارىنا كوڭىل ايتىپ، كۇڭىرەنىپ سوڭعى ساپارىنا شىعارىپ سالدىق. ەكىنىڭ ءبىرى جاسايتىن جاس ەمەس، اللا-تاعالا ول كىسىنىڭ جاسىن ۇزاعىنان بەرسە دە، قيماي-قيماي قوشتاستىق، امال نەشىك، مويىنسىندىق. 

وتكەن جىلدىڭ اياعىندا ماسكەۋدەگى يمەكەڭ جاساپ بەرگەن كورمەمە باراتىن كەزىمدە، 14 جەلتوقساندا الدىنان ءوتىپ باتاسىن العانمىن – بالاشا قۋانىپ ەدى. مارقۇم اكەم ءاسىلحان وسپانۇلىنى ەكەۋى كەرەمەت دوس، جان جولداس، تەرەڭ سىرلاس جاندار بولاتىن. اكەمنىڭ ورنىڭ تولتىرا الماسا دا جوقتاتپايتىن. ماسكەۋدەن كەلە سالا تاعى بارىپ كورمەنىڭ قالاي وتكەنىن ايتىپ اقساقالدى بالاداي قۋانتىپ ەدىم، كىم ءبىلدى سوڭعى رەت كورىسىپ وتىرعانىمىزدى. مەنى باتاسىز جىبەرمەيتىن. الىسقا جۇرسەم ۇزاق باتاسىن بەرىپ، جاي كىرىپ شىقسام قىسقا قايىرسادا جولىمنىڭ اشىق، باسىمنىڭ اماندىعىمدى تىلەپ جىبەرەتىن. قولىنداعى ۇلى، مەنىمەن قۇرداس جارقىن سول كەزدەرى اۋلادان شىعارىپ سالىپ تۇرىپ جيىرەك كەلىپ تۇرشى دەپ وتىنەتىن. ونشا-مۇنشا كەلەمىن كىسىلەردىڭ بەتىن امالسىز قايىرىپ وتىرمىز، تەز شارشاپ قالادى، ال سەن كەلىپ كەتسەڭ كەرىسىنشە مارقايىپ، ءبىر سەرپىلەدى دەپ… مەندە كەلگەن سايىن قۇر جۇرمەي ايتەۋىر ءبىر جاڭالىق بولارلىق حابار الىپ، نەمەسە جاڭا كىتاپ، مۇمكىن بولسا ءوزىمنىڭ تىڭ جوبامدى، اشقان جاڭالىعىمدى ارقالاپ كەلىپ ۇزاق سىرلاساتىن ەدىك. كەيبىردە الدىمەن ەنتىگىپ سويلەي الماي، قينالىڭقىراپ، دەمىن الىپ ءۇزىپ-ءۇزىپ سويلەگەن سوڭ، مەن ىشتەي شارشاتتىم-اۋ دەپ ويلانىم قالعانىمدا، بىرتىندەپ ءسوز ساپتاۋى مەن داۋسى اشىلىپ، بەس-التى مينۋت وتكەن سوڭ قىزىپ، ءبىر ۋاقىتتا جىگىتشە سويلەي جونەلەتىن ەدى توقساننان اسقان ابىز اتامىز…

ازىرەتى وماردىڭ ۇرپاعى، قوجانىڭ قىرىقساداق سۇيەگىنەن شىققان ءادىھام اعامىز ەندى كەلمەسكە كەتتى. ارتى قايىرلى، يمانى سالامات بولسىن دەپ تەك ارتىنان دۇعا جاساۋدان باسقا امالىمىز قالمادى ەندى. بالداي اپامىز دا كۇتىپ قالعان شىعار، ەكەۋىنىڭ دە جاندارى ءجانناتتا بولعاي! 

ەرالى وسپانۇلى

ومىردەرەك

ءادىھام شىلتەرحانوۆ 1925-جىلعى 24-شىلدەدە قازىرگى تورتكۇل اۋىلدىق وكرۋگىنە قاراستى ەلشىبەكباتىر اۋىلىندا دۇنيەگە كەلگەن. تولەبي اۋدانىندا ورتا مەكتەپتى، الماتىدا اۋىلشارۋاشىلىق ينستيتۋتىن ءبىتىردى. 1943-1944-جىلدارى داڭقتى پانفيلوۆ اتىنداعى 8-ءى گۆارديالىق ديۆيزيانىڭ 23-ءى پولكى قۇرامىندا ۇلى وتان سوعىسىنا قاتىستى. لەنينگراد قۇرساۋىن بۇزعان شايقاستا اۋىر جارالانىپ، ەلگە ورالدى. 1945-1969-جىلدارى قازىرگى ورداباسى اۋدانىندا مۇعالىم، بايدىبەك اۋدانىندا مۇعالىم، اۋداندىق كومسومول كوميتەتىنىڭ حاتشىسى، اۋداندىق گازەتتىڭ ءبولىم مەڭگەرۋشىسى، اۋداندىق پارتيا كوميتەتىنىڭ نۇسقاۋشىسى، كەڭشاردىڭ باس اگرونومى، ۇجىمشار پارتيا ۇيىمىنىڭ حاتشىسى، ۇجىمشار توراعاسى بولدى. 1969-1981-جىلدارى قىزىلقۇم اۋدانىنداعى ارىس كەڭشارىنىڭ ديرەكتورى، 1981-1985-جىلدارى اۋداندىق تۇرمىس قاجەتىن وتەۋ كومبيناتىنىڭ ديرەكتورى قىزمەتىن اتقاردى. 1985-جىلدان كەيىن تۆورچەستۆولىق جۇمىسپەن اينالىسىپ، ادەبيەتىمىزدىڭ كەيبىر تۇستارىن زەرتتەپ، كوركەم تۋىندىلار بەردى.

«ءۇش بايتەرەك»، «اقجالدىڭ اقىرى»، «اتالى سوزدەر»، «ساتتار ەرۋباەۆ»، «دالا مەن دانا» كىتابى جانە «ورداباسى» باسپاسىنان شىعارمالارىنىڭ ءۇش تومدىعى جارىق كوردى.

1 دارەجەلى وتان سوعىسى وردەنىنىڭ، 18 مەدالدىڭ، قازاق كسر جوعارى كەڭەسى قۇرمەت گراموتاسىنىڭ، «ەل اعاسى» اتالىمىنىڭ يەگەرى، ورداباسى جانە بايدىبەك اۋداندارىنىڭ قۇرمەتتى ازاماتى.

جۇبايى بالداي قۇلبەكقىزىمەن 5 ۇل جانە 1 قىز ءوسىرىپ تاربيەلەدى. بارلىعى دا جوعارى ءبىلىمدى. نەمەرەلى، شوبەرەلى.

سونداي-اق، وقىڭىز

«بياعا» – ءباتيما بابايقىزى

ايمان اپاي مەن ءماج تاتەنىڭ ء(ماريا وسپانقىزى جاميەۆا) ەستەلىكتەرىنەن قىلىش باباەۆتىڭ قىزى مايا قىلىشقىزىمەن سويلەسكەنىمدە …

پىكىر قالدىرۋ

ە-پوشتا مەكەنجايىڭىز جاريالانبايدى. مىندەتتى ورىستەر * تاڭبالانعان