باسقى بەت / بىلگەن شايىر ايتادى / ازىرەتى مۇحاممەد سالاللاھۋ الەيھي ۋا-س-سالام.

ازىرەتى مۇحاممەد سالاللاھۋ الەيھي ۋا-س-سالام.

مايلىقوجا سۇلتانقوجاۇلى

وتەر دۇنيە وپاسىز ءتۇبى قاسىرەت،

ناماز – بامدات وتكەن سوڭ ءبىر كۇن ازىرەت.

ءمىنباردىڭ باسىنا اۋىپ وتىردى دا

ساھابالارعا ايتادى كوپ ناسيحات.

 

وتىرعان ساھابالار بارسىن دەدى

وتىرۋى ءمىنباردىڭ باسىن دەدى.

اركىمنىڭ قىساسى بار بولسا بىزدە

جىبەرمەي اقىرەتكە السىن دەدى.

 

ەكى ايتقانشا ەش ادام ۇندەمەدى

بەرەمىن قىسا سالسا كىمگە دەدى.

ءۇشىنشى ايتقان ۋاقىتىندا ەر ۇكاشا

ورنىنان قول قۋسىرا تۇرەگەلدى.

 

ازىرەتتىڭ اۋەلى اللا ءتۇرىن سالعان

ۇكاشا دا ىنتىق بار بۇرىن كۇننەن.

ءۇش ايتقاندا ۇكاشا تۇرەگەلدى

ءبىر قامشى قىساس بار دەپ ورىنىنان.

 

ازىرەت ءدىن يسلامنىڭ پاتشاسى ەدىڭ

ءجاھانگە نۇر جانەتكە باستاۋشى ەدىڭ.

ءۇش ايتىڭىز ءىزاھلاپ قالايىققا

اگار كوپ ايتپاساڭىز ايتپاس ەدىم.

 

ساپاردان قايتقان كۇنىم شىقپاس ەستەن

تۇيەنى ۇرعان قامشىڭىز ءوتىپ كەتكەن.

ازىرەت ءۇش ايتىڭىز ارىزى قىلىپ

ەكى ايتقانشا تۇر ەدىم ۇندەمەستەن.

 

ۇكاشادان جاماعات بولدى مالال

ازىرەتىمە كەلەر دەپ ءبىر زالال

ءسۇيىندى ازىرەتىم ەسىتكەن ول

ريزامىن، ۇكاشا قىساسىڭدى ال

 

ۇكاشا ايتتى بۇل قىساس تەڭ كورمەدىم.

ءسىز الدىڭىز قامشىمدى مەن بەر دەدىم

ءسىز تۇيەنىڭ ۇستىندە ۇرىپ ەڭىز

ارقام اشىق جاياۋ مەن جەردە ەدىم

 

اي ۇكاشا مىنبارعا ورلە دەدى.

ازىرەتىم پاسىراق جەرگە كەلدى

وتىرعان ساحابالار ءپىدا بولىپ

قامشىڭدى بىزدەن العىن دەپ ەڭىرەدى.

 

جالىندى اۋەل سىدىق ءابۋ باكىر

ازىرەت ءۇشىن قامشىڭدى بىزدەرگە ۇر

ازىرەت ومار، ءالى جانە ازىرەت ۋسمان

ءالى ايتتى، ازىرەت ءۇشىن ءجۇز قامشى ۇر.

 

ۇكاشاعا حالىق جىلاپ تۇرىستى ەندى

قوي سىزدەرمەن بىتپەيدى جۇمىس دەدى.

يا ازىرەت ارقاڭىزدا كويلەك تون بار

ول قىساسىم كەلمەيدى دۇرىس دەدى

 

ساھابالار جىلانىپ تۇرار ەدى-اي،

بولماعان سوڭ مالامات قىلار ەدى-اي،

ازىرەتىم ارقاسىن جالاڭاشتاپ

كويلەك تونىن ىشىنەن شىعاردى ەندى-اي.

 

ازىرەتىم پاسىراق جەرگە كەلدى

ۇكاشا مەيىر ناۋبەت كورمەك ەدى.

مەيىرى ناۋبەتىن ەندى كورگەننەن سوڭ

ماقساتىم وسى ەدى دەپ زار ەڭىرەدى

 

ۇكاشا ايتتى ءسىز ءۇشىن بولسام ءساباب

مەيىرىڭىز كورمەككە قالدىم ءسادات

رۇقسات بولسا زيارات قىلسام دەدى

مەيىر ناۋبەتتى ەندى قىلدى ءتاۋاپ.

 

بارشا حالىق ءتاۋاپ قىلدى ماڭلايىنا

جۇبانىپ كوڭلى ءتۇستى جاي-جايىنا

ۇكاشاعا ءبارى دە ريزا بولدى

بۇرىن بىلمەي جىلاسقان قاندايىنا.

 

ءبىر كۇنلاردا ازىرەتىم تۇيە ءمىنىپ

قاسىندا ساھابالار بىرگە ءجۇرىپ

اللادان  تۇيە ۇستىندە ءۇن كەلەدى

قۋاندى ساھابالار كوپ ءسۇيىنىپ

 

ساھابالار قۋانىشتا تۇرار ەدى

ازىرەت ءابۋ باكىر جىلار ەدى.

قۋانىش كۇندە نەگە جىلايسىز دەپ

ساھابالار سىددىقتان سۇرار ەدى.

 

ايتايىن مەن سىزلارگا جىلاعانىم

جىلادىم ءسوز ەستىپ شىدامادىم.

ەندى ازىرەت كەتەدى دۇنيەدەن

ەسىتىپ سابىر تاعات قىلا المادىم

 

كوپ جۇلدىزدا كورىك بولماس ايى بولماي

ازىرەتتىڭ كەتۋى جاقىن بولدى-اي

سىزدەر ءۇنى كەلدى دەپ قۋاناسىز

نە ءسوز ايتىپ كەتكەنىن پايىمداماي.

 

ۇكىمى وزگە بولماس ءبىر اللانىڭ

سول ەدى مەنىڭ ەڭىرەپ جىلاعانىم.

ەندى ازىرەت كەتەدى ورتامىزدان

سول سەبەپتەن سابىر قىپ تۇرا المادىم

 

قۋانعان ساھابالار تۇمسارىسىپ

باستارىنا قايعىلى كۇن سالىسىپ

ءابۋ باكىر سىددىقتان اڭلاعان سوڭ

باستان اياق جىلادى ءۇن سالىسىپ.

 

ازىرەتكە قالعانى ون جىل ەدى،

ون جىلدان بەرمەن قاسال بوپ جۇرەر ەدى.

ءابۋ باكىر سىددىققا رۇقسات بەردى

مەشىتكە ءسىز ەندى يمام  بولعىن دەدى.

 

ازىرەت ازىپ ەدى قالمايىن ءال،

مەشىتكە بارىپ ازان ايتتى ءبىلاب

جاماعاتتان قالارعا شىداي الماي

بارماققا ازىرەتكە ءتۇستى قيال.

 

الىگە ءبىر قولىمنان سۇيە دەدى.

ابباسۇلى ءپازىل ءام سۇيەي كەلدى

ءابۋ باكر مەھراپتان تايا بەرىپ

ازىرەت كەلگەننەن سوڭ تۇرەگەلدى.

 

ازىرەتىم تەبىرەندە قويعىن دەدى

مەشىتكە ءسىز ەندى يمام بولعىن دەدى.

ازان داۋىسىن ەسىتىپ شىداي الماي

ارتىڭنان ۇيىماققا كەلدىم دەدى.

 

ناماز وقىپ ءبىر ساھارا ۇيگە كەلدى

ەسىكتەن ءبىر اراب بىرگە كەلدى.

سويلەسىپ ازىرەتتىڭ رەڭى تايدى

ەكەۋى كەلىپ، قايتىپ جۇرە بەردى.

 

سويلەسىپ ازىرەتتىڭ رەڭى ۇشتى

اق تارتىپ ىرەڭىنە مۇڭلىق ءتۇستى.

جىلادى ساھابالار ازىرەتكە

ءيا، ازىرەت ءبىلدىڭىز دەپ نە مۇكىستى.

 

ءيا، ازىرەت ىرەڭىڭىز وزگەلەندى

ەكى اراب نە دەدى سىزگە دەدى؟

جاراتقاننان نە  ءتۇرلى جارلىق كەلدى.

ەكەۋى كەلدى قانداي سوزگە دەدى

 

ازىرەيىل ول جابىرەيىل قاتتى دەدى

قاتتى كۇن كوڭىلىمە باتتى دەدى.

ول ەكەۋى ايتادى ناسيحاتتى

ءسوزىمىزدى سىزدەرگە ايتقىن دەدى.

 

ازىرەت ايتتى پەرىشتە ول ەكى اراب

اجال جەتسە باندەنىڭ ءالى قاراپ

سىزدەردەن ءبىزدى ايىرىپ اكەتەد دەپ

جىلاي بەردى كوزىنەن جاسى پارلاپ.

 

ءۇمماتىڭ تۇتسىن ءامىرىن اقتىڭ دەدى

ءبىز ايتقان ناسيحاتتى ايتقىن دەدى.

امان بول ساھابالار جولداستارىم

ايرىلار بولدى مەنىڭ ۋاقىتىم دەدى.

 

ءناپسىنىڭ كوڭىل بەرمە اۋەسىنە

دۇنيەنىڭ الدانباڭدار بالەسىنە.

راسى تۇرىپ يماننان ايرىلماڭدار

سولاردىڭ ناسيحاتىن ال ەسىڭە.

 

بايلار مالدان قاراسسىن مالى ازدارعا

جانە دە جاردەم بەرسىن قارىزدارعا

قۇل، كۇڭگە ارتىق قىزمەت بەرىلمەسىن

راحىم قىلسىن مۇڭى كوپ ءالى ازدارعا

 

اعىزدى پايعامبارىم كوز جاستارىن،

وتكىزدى ءبىرىن-ءبىرىن ءسوز داستانىن.

ورتاڭىزدا مەن قانداي پايعامبار ەم،

ساھابا شاھاريار جولداستارىم.

 

وتىرعان ساھابالار جاراندارىم،

مەنەن قالىپ باراسىڭ تامام ءبارىڭ.

كورگەنىڭىز بويىنشا ايتىڭىزدار

كوڭلىڭىزدە بار بولسا نالالارىڭ.

 

وتىرعان ساھابالار سويلەدى اڭلاپ

ازىرەت ءسىزدى وزدىردى اللا تاڭلاپ.

ايتقانمەن سيپاتىڭىز تاۋسىلماستى

شۋلاپ ءبارى جىلاستى قويداي ماڭىراپ

 

ءسىز جاقىن اتامىز بەن انامىزدان

جان شىققانعا بارا-بار ءتانامىزدان.

قالايىققا قاراڭعى زامان بولار

ءسىز ايرىلىپ كەتكەن سوڭ ارامىزدان

 

ءسىز ءۇشىن كەلىپ ەدى ايات، قۇران،

ۇيرەنىپ تىلدەرىمىز بولدى پىران.

قاسيەتتى قادامىڭىز قۇتتىعىنان،

كوپ بولدى كاپىرلەرگە عارزى يمان.

 

نە تاستار سوزىڭىزگە ەرىپ ەدى

مۇسىلمان بولدى ادام، پەرىلەر دە

تۇر ەدى اسپان ءجۇزى نۇرعا تولىپ

كەتسەڭىز اي باتقانداي كورىنەدى.

 

بارماقتان بولۋىڭىز جالعىز ەدى،

ۋماتىم دەپ تاپتىڭىز جالعىز قايعى.

ەكى جاھان اپتابى امان بولعىن،

ەش باندەنى دۇنيە قالعىزبايدى.

 

ارشا الادان استىڭىز مەھراج بارىپ،

ءدىن يسلام قۋاتتاندى رۋاجالىپ.

اۋەلدەن اقىرعىنشا تەڭىز ەدىڭ،

ارماندامىز ايرىلار كۇن از قالىپ.

 

سىزبەنەن ەش پايعامبار تەڭ كەلمەدى،

ءدىن اشىپ جاھان كاپىرىن جەڭگەن ەدى.

بالىقتىڭ تىرشىلىگى سۋسىز بولماس،

سىزدەن سوڭ نە بولامىز دەپ ەڭىرەدى.

 

نۇرىڭىز بۇل جاھاندى كەلىپ باستى

كوڭىلگە ورناتتىڭىز گاۋھار تاستى.

ءبىرىن-ءبىرى كورىسىپ ساحابالار

قوشتاسىپ كوزدەرىنەن توكتى جاستى.

 

رازداسىپ، قوشتاسىپ ءۇش كۇن ءوتتى

ازىرەتتى اۋرۋ زورلاپ مۇشكىل ەتتى.

ايدان اق ايدارلارى سارعايدى دا

ازىرەتتىڭ سەكىلدەندى كۇشى كەتتى.

 

باسى ايشا تىزەسىندە جاتىر ەدى

پاتىما ءام اسان، ۇسەن وتىر ەدى.

مالاكۇل ماۋت پەرىشتە ءبىر اراپ بوپ

ادەپپەن سالەم بەرىپ اقىرىن كىردى.

 

ءيا، ازىرەت كىرمەككە رۇقسات بار ما دەدى

ازىرەتىم كەلگەنىن بارلاي بەردى.

ازىرەتتىڭ سويلەسەر ۋاقىتى جوق دەپ

ايشا اپا كەلمەسىن دەپ زارلاي بەردى.

 

بىرەۋىڭ ايت كەلمەسىن دەدى ايشا

ازىرەت جاتقانى جوق تىنىش بوپ جايشا.

ازىرەت ايتتى رۇقسات بار كىرسىن دەدى

مالاكتى قايتارماققا شاراڭ قانشا.

 

ءيا، ايشا ول قايتاراتىن كىسى ەمەس

قوي دەمەككە ەشكىمنىڭ كۇشى كەلمەس.

اللانىڭ اتقان وعى ءپارمانى ول،

الماي قايتپاق ازىرەيىل ءىسى ەمەس.

 

وتىردى ازىرەيىل پەرىشتە كەپ

ازىرەت ايتتى كەلدىڭىز نە ىسكە دەپ.

ايشا انا، ءبيبى پاتىما، اسان-ۇسەن

اراپ بولىپ كەلگەنىن تەرىس كورىپ.

 

ازىرەيىل ايتتى پارمان بۇل بولدى دەپ

پاتشا سىزگە ءامىر قىلدى ەندى دەپ

ديداردى ءتىرى كورمەك دۇنيەدە ەمەس

دوس-دوسقا جولىعىسار كۇن بولدى دەپ.

 

ازىرەت ايتتى ازىرەيىل ءتىل الماسسىڭ

ۇكىمدى ورىنداماي تۇرا الماسسىڭ

الۋىڭ بار ەشكىمدى قويارىڭ جوق.

اماناتى يەسىنە بولاعالسىن

 

شىنى مەنەن اللادان ۇكىم كەپتى

ءار پەندەگە ءبىر ناۋبەت ءولىم جەتتى

مۇباراك دىماقلارى  قۋراپ ءبىتىپ

مۇڭلىق بوپ ازىرەتتىڭ كوڭىلى كەتتى.

 

جان وڭ سولعا تەبىرەلدى ءتاسىل-ءتاسىل

اياقتان باسقا تارتتى ولار ءماسىل

سۋ شاشتى كوكىرەگىنىڭ كۇيگەنىنە

قۇرالايداي كوزدەرى بولىپ جاسىل.

 

ايداي جارىق ىرەڭى تۇمسارىسىپ

بۋىندارى ۇزادى بوسانىسىپ.

ايشا اپا، ءبيبى پاتىما، اسان،ۇسەن

جىلاپ داۋسىن شىعاردى ءۇن سالىسىپ.

 

قاتتى مۇڭلىق عارىپ ءال بوپ قالدى ەندى

جان تارتىلىپ كوكسىنە كەپ قالدى ەندى

ازرايىلعا سويلەدى ازىرەتىم

اسىقپا، ءبىر ءسوزىم بار توقتا دەدى.

 

ساھابالار كەلىستى سىرتتان توپ-توپ

ازىرەت دەپ جىلاسىپ ايتىپ جوقتاپ

قامىردان قىل تارتقانداي ازىرەيىل

قيمىلداماي ءسوز تىڭداپ قالدى توقتاپ.

 

ازىرەيىل اللانىڭ ءامىرىن كۇتتى

جارلىق سولاي كۇتپەسكە بولماس ءتىپتى.

ازىرەت ايتتى جان بەرگەن قيىن ەكەن

ءۇمماتلارىم ازابىن ماعان جۇكتە

 

جاننىڭ مۇنشا بىلمەدىم تاتتىلىگىن

قانشا جۇمساق الساڭ دا باتتى بۇگىن.

مەنەن سوڭ ءۇمماتلارىم قينالماسىن

ءبارىنىڭ وزىمە سال قاتتىلىعىن.

 

ولارعا ءبىر-ءبىر توسار وسى كۇن ءال

ءبارىنىڭ جان ازابىن وزىمە سال.

ساعان ايتار ازىرەيىل ءسوزىم وسى

ءۇمماتلارىم جاندارىن جۇمساق قىپ ال.

 

يا، ازىرەت ءسىز ايتقان ءسوز جارار بولدى

ارقامنان جەتپىس مارتە حابار كەلدى.

وزگەلەرگە قاتتى الما جۇمساق ال دەپ

مەنىڭ دە بۋىنىم بوساپ قالار بولدى.

 

يا، ازىرەت ءسىزدى اللا قادىرلەدى

قانشا ءازىز باندالار جابىرلەندى.

پاتشالار شاشىن العان شاشتارازدا

باسىندا سابىر ەتىپ كۇلىپ قالدى.

 

ازىرەيىل جەتپىس مارتە جۇمساق الدى-اي

ىشتەن تىستان ساھابا قورشاپ قالدى-اي.

مەنى قويىپ وزگەگە سويلەيسىز دەپ

ايشا اپا زار ەڭىرەپ قۇشاقتايدى.

 

مەن عارىپتىڭ كىم سىزدەي ءالىن بىلەر

پاتشا قۇداي سىرىمنىڭ ءبارىن بىلەر.

يا، ازىرەت ءسىز كەتكەن سوڭ تاعاتىم جوق

وزگەنىڭ ءتانى كۇيسە جانىم كۇيەر.

 

بارادى كوكىرەگىم وتتاي جانىپ

ىشقىڭىز سۇيەگىمنەن كەتپەي قالىپ.

سىزگە جەتى جاسىمدا قوسىلىپ ەم

بارامىن جيىرماعا جەتپەي قالىپ.

 

جەتى مەن جيىرمانىڭ اراسىنان

ايرىلسام ەكى جاھان ساراسىنان.

ايشا جىلاپ ازىرەتتى قۇشاقتايدى

ايرىلىپ قالدىم با دەپ راسىمەنەن.

 

بولار ما ءولىم ءىسى مۇنشا قاتتى-اي

ازىرەتتى كورەر ەدى ايشا ءتاتتى-اي.

ايشا انا زار ەڭىرەپ اجىراعان سوڭ

قۇشاقتاپ ريزالاستى ءبيبى پاتىما-اي.

 

جان اتام، مەيىربانىم، شىرىن اتام

باراسىز دۇنيەدەن ءجۇرىپ اتام.

ساعىنىپ كوزىمىزدەن ءبىر-ءبىر ۇشار

بۇل جاھانعا جاراسقان نۇرىڭ اتام!

 

ازىزلەردىڭ ىشىندە ءازىز اتام،

سىزدەن سوڭ ءتاھاتىم جوق ءار كەز اتام.

كوكتەن مالاك الدىندا قىزمەت قىلعان،

جاھاندا ايلاسى وزعان جالعىز اتام!

 

ارشالانى جول قىلىپ وتكەن اتام،

ادام اتا پايعامبار ارزى قىلىپ.

كورەرگە ءومىرى جەتپەي كەتكەن اتام.

ءابيبىلار ىشىندە ءابيبى اتام!

 

اللانىڭ تاعدىرىنا ەش ىلاجى جوق

نە ويلايىن مەيىربانىم جانىم اتام.

ىرايمان اللانىڭ راستى ەدىڭ

بۇل جاپانعا كەلگەن نۇر، داۋلەت ەدىڭ.

 

ەكى جاران ىشىندە شاپاعاتشى

اقىرەتتە وسىلارعا راحات ەدىڭ.

جاھان نۇرعا تولتىرىپ كەپ ەدىڭىز

كوزىڭىزدى ۇيقىعا ءبىر قاندىرماي

تويا دۇنيە تاعامىن جەمەدىڭىز.

 

ءسىز كەتكەن سوڭ جاراسپاس ءساھانىم قاي.

مەندە سىزگە ارتىڭنان بارامىن-اي.

ساھابالار جولداسىڭ مەيھاپ ورىن،

ءسىز كەتكەن سوڭ مەن نەشۇك قارايىن-اي!

 

ساھابالار سىرتتا ەڭىرەپ قاز قاتارى

رازداسىپ پاتىما ءسوز ايتارى

قاتتى جىلاپ داۋسىڭدى شىعارما دەپ،

پاتىما قويعىن دەدى ازىرەت ءالى.

 

ازىرەت ايتسا ءالى تىڭلا دەدى

پاتىما جىلاي بەرسىن، تىيما دەدى

اتا-انانىڭ جاستىعىندا قىز جىلاسا،

ءولىمنىڭ كوركى بولار قىيلا دەدى.

 

سونان قىز حالىق ايتادى جوقتاعانداي،

بولماس ەدى ازىرەت ايتپاعانداي.

ازىرەت جاتىپ-جاتىپ كوزىن اشتى،

جاناپ جىمعا تايانىپ كەپ قالعانداي.

 

كوپ داۋىسى باسىلدى حالقىنىڭ دا

ءىسى قيىن جان شىقباق تولقىنىندا.

ازىرايىلگە توقتاي تۇر دەدى ازىرەت

جان تايانىپ كەلگەندە القىمىنا .

 

جابىرەيىلدى ەرتىپ كەل بار ءبىر ءسوزىم.

بارامىن ءوتىپ كەتىپ ەندى ءوزىم

بۇرادارىم جابىرەيىل جاقىنىمدى

ءبىر كورىپ دۇنيەدە كەتسىن كوزىم.

 

ازىرەت بۇل ءسوزدى الدى لابىزىنە ءبىر

ءازىر قىپ ەرتىپ كەلدى ازىرەيىل.

جەتپىس مىڭ پەرىشتەمەن ازا تۇتىپ

ازىرەيىل دەپ جىلاي كىردى جابىرەيىل.

 

ازىرەت ايتتى عارىپلىك قالدا ەدىم

سىزبەنەن جاقىندىعىم قانداي ەدىم.

عارىپ بولعان كۇنىمدە حابارلاسپاي

جابىرەيىل، بۇرادارىم قايدا ەدىڭ.

 

يا، ازىرەت ءامىرىڭىزدى كەلدىم كۇتىپ،

الامنان كەتەر بولدىڭ ۋاقىتىڭ ءبىتىپ.

جەتى قات كوك پەرىشتە جىلادى دا،

مەن دە سوندا بىرگە ەدىم، ازا تۇتىپ.

 

 

ازىرەت ايتتى دۇنيەدەن مەن كەتەرمىن،

بۇل ۋاقىتتا تەز كەتپەك دەمدە تۇرمىن.

ءار كەلگەندە ءبىر جاقسى ساۋحات ەدى،

بۇل ساپار ساۋحات ءۇشىن نە كەلتىردىڭ؟

 

جەتى قات كوك پەرىشتە جىلاسىپ تۇر،

جانات ءىشى اشىلىپ جاراسىپ تۇر.

شارپار تاباق ىشىندە نۇر تولتىرىپ،

جانىڭىزعا ىنتىزار قاراسىپ تۇر.

 

مەن سىزدەن ول جاۋاپتى سۇراماس بان

اسى ءۇمماتلار كوپ ەدى كۇنا باسقان.

وزىمنەن سوڭ ولاردى نە قىلادى

سونان باسقا تىلەكتى سۇراماس بان.

 

جابىرەيىل عايىپ بولىپ جانە كەتتى

بىردەمنەن سوڭ ازىرەتكە جانە جەتتى.

جاراتقان مەيىربانلىق جارلىق قىلدى.

يا، مۇحاممات قۇدايىم سالەم ايتتى

 

جاس ۇلاندى اناسى تەڭىز سالدى،

ماعان امان ساقتا دەپ جىلاپ قالدى.

امان ەسەن وزىنە تابىس قىلدىم

جىگىت بولعان ۋاعىندا قايتىپ الدى.

 

دوستىمنىڭ مەن قارارمىن قاباعىنا

مەيىربانمىن اۋەلدەن اياعىندا.

جەتى ءجۇز جادىگويدى باتىل قىلدىم

مۇسىلماننىڭ ءبىر تەبىرەنتكەن تاياعىنا.

 

دوسىمدى ەكى الامعا باس قىلامىن

راحمەتىم دارياسىن تاستىرامىن.

دوستىم ماعان تاپسىراسىڭ ءۇمماتلارىن

ءوزىم امان وزىنە تاپسىرامىن.

 

راحىمنىڭ ازىعىن بىلگىزبەيمىن

وزگەلەردىڭ تەڭىنە جۇرگىزبەيمىن.

ءۇممات ءۇشىن ەرىنىن ءبىر تەبىرەنتسە

ساۋ-سالامات جاننەتكە كىرگىزگەيمىن.

 

ول ءۇشىن قايعىرماسىن دوستىم دەدى

بەدەلىمنىڭ بارىسىن كەشتىم دەدى.

يا، ازىرەت اللاعا بارىپ كەلدىم

مەيىربانلىق ءامىرى وسى دەدى.

 

وپاسى جوق دۇنيە قالا بەردى

اقىرەتكە ساپارلانىپ كوزىن جۇمدى.

ءوزى ولەردە ەكى ءۇش ءسوز اۋزىنا الدى

اقىلى كوپ ايشا اپا قۇلاق سالدى.

ورازا تۇت، نامازدى جازباي وقى

قام كوڭىلدى جاقسى كۇت دەپ بەردى جاندى.

قىرىق جاسىندا اللادان ۋاقي كەلدى

الپىس ءۇشتىڭ ۇستىندە عۇمىرى تولدى.

ون ەكىنشى ءراببىل اۋال ايىندا

دۇيسەنبى كۇنى دۇنيەدەن ازىرەت ءوتتى.

جانازاعا پەرىشتە تامام تولدى

جەردە مومىن، كوكتەگى مالاك كەلدى.

ون ەكىنشى دۇيسەنبى دۇنيە سالدى

ون ەكىنشى دۇيسەنبى جەرگە كومدى.

دۇيسەنبى دۇنيەگە كەلىسى دە

دۇيسەنبى دۇنيە سالىپ ءولىسى دە.

ون ەكىنشى كۇنىندە ءوتتى ازىرەت

توپىراققا ارالاستى ون ۇشىندە.

يا، كوڭىل مۇڭايماعىن شۇكىرىمە

ۇمماتلىككە ساراپ ەتكىن ءومىرىڭدى

اسى ءۇممات نە كورسەتتى مۇحەممەتكە.

سونشاما ارا ءتۇستى ولەرىندە

 

جارلارى ءابۋ باكر، ازىرەت ومار

ءۇشىنشى ازىرەت وسمان اسحابۋلار

ءتورتىنشى ازىرەتى الىشەرى قۇدا.

سەگىز پەيىش قوجاسى سول ءتورت شاھيار

 

سولار دەيدى جانناتتىڭ قوجاسى-اي

وزگەلەردىڭ ءبارى دە ءوز جايىنا-اي.

اقىرەتتىڭ داۋلەتى سول ەرلەرگە

ورازا تۇت، ناماز وقى قازا قىلماي.

 

ءتاڭىرىم ساقى جارلىعىن قازا قىلماي

ءتاھات بولماس كوڭىلدى تازا قىلماي.

ءان ازىرەت اللاعا ايتىپ كەتكەن

ازىرەت بولاتلاردىڭ بولاتىن-اي.

 

شىقپادى پايعامبارلار ءانىڭ ارتىنان،

اسپاننان جەرگە تۇسكەن ءتورت كىتاپ تا.

ازىرەتتىڭ وزىقتىعىن كوپ اتاعان

 

ەكى بىردەي جارانعا بولدى قۇتتى.

ءۇممات ءۇشىن رەنجى تارتىپ، قاباق شىتىپ

پەرى، پەرىشتە جانە دە ادامىزات،

ءبارلارى ءوزىن سوعان ءۇممات تۇتىپ.

 

ءان ازىرەت جەر استىنا قالدى جاتا.

ارزى قىپ ايتادى ەكەن ادام اتا

 

ادامنان بەرگى تامام پايعامبارلار

سوعان ءۇممات بولساق دەپ ايتا-ايتا.

 

تالقىنان جاراعان كۇن مەنەن اي

ويلاساڭ دۇنيەنىڭ اقىرى اي.

ەكى الامدى جاراتقان سابابىنەن

ءان ازىرەت جەر استىنا بوپ كەتتى جاي.

مايلىقوجا اقىننىڭ بۇل شىعارماسى اسان مولدا اسىلبەك ۇلىنىڭ قولجازباسىنان الىندى. شىعارمانى ەسكى اراب عارىپىنەن اۋدارعان سەيتومار ساتتارۇلى.

سۋرەتتى تۇسىگەن سۇلتان سەيىت

سونداي-اق، وقىڭىز

سەيىتجاپپار تورەگە حات

 مايلىقوجانىڭ تۋىلعانىنا 185-جىلدىعى قارساڭىنا  مايلى قوجانىڭ ءبىر سايلاۋدىڭ سارساڭى جايلى مىرزاحمەت بابانىڭ تۋعان بولەسى قاسىمحاننىڭ …

پىكىر قالدىرۋ

ە-پوشتا مەكەنجايىڭىز جاريالانبايدى. مىندەتتى ورىستەر * تاڭبالانعان