بالىقشى اۋليە

بۇل اۋليەنىڭ مۇردەسى تەرىسكەيدەن تۇركىستانعا اساتىن سۋىندىق دەگەن جەردە. باسىندا  ۇلكەن بۇلاعى بار. بۇلاعىندا شۇپىرلەگەن بالىق. سۋى تاستاي، شيپالىق قاسيەتى ءمالىم. بۇلاق باسى نۋ توعاي-ورمان تال. بالىعىنا ەشكىم تيىسپەيدى، جەم تاستاپ ىرىم قىلادى. ۇستاعان كىسى جامانشىلىققا كەزىگەتىن كورىنەدى.

قاسيەتى: جولاۋشىعا اق جول وڭعارادى. تازالىقتىڭ، ادالدىقتىڭ، ىرىس-ىنماقتىڭ دانەكەرى، باتاگوي رۋح. تۇسىنان وتكەن جولاۋشى كولىگىنەن ءتۇسىپ، دۇعا قىلماي، نە تۇنەمەي كەتپەيدى.

كەز-كەلگەن اۋرۋدىڭ شيپاگەرى، جابىققاندى جەبەۋشى. اسىرەسە، شالىقتاعان اۋرۋ كىسىلەر كوپ تۇنەپ، زيارات قىلادى.

1959 جىلى سوزاققا كەلگەن جازۋشى مۇحتار اۋەزوۆ بالىقشى اتا باسىندا ءۇش كۇن بولعان. بۇل تۋرالى سوزاق سوۆحوزىنىڭ تۇرعىنى زەينەتكەر، قۇيماقۇلاق شەجىرەشىسى كارىباي سارىبايۇلى بىلاي دەپ اڭگىمەلەيدى:

-بالىقشىدا ول كەزدە شوپاندارعا ارنالعان دەمالىس ءۇيى بار ەدى. سوندا دەمالىپ جاتقانبىز. كۇزگە سالىم بولاتىن.  «مۇحتار كەلەدى» دەگەندى ەستىدىك. كوپ ۇزاماي-اق تۇسكە تاياۋ ەكى جەڭىل ماشينا جەتىپ كەلدى. الدىڭعىسىنان ءبىرىنشى حاتشى قوسپانبەتوۆ، ەكىنشىدەن جازۋشى مەن سوزاق سوۆحوزىنىڭ ديرەكتورى  احمەتشەەۆ، قازىرگى بەلگىلى جازۋشى ەركىنبەك تۇرىسوۆ ءتۇستى.  امان-ساۋلىق سۇراسقان سوڭ:

-جولداس حاتشى، بۇل قاي جەر؟-دەدى مۇحاڭ.

-بالىقشى،-دەپ جاۋاپ بەردى حاتشى.

-ونىڭ باسىندا تالى، بۇلاعى، بەيىتى بار دەۋشى ەدى عوي،-دەپ جان-جاعىنا قارادى. حاتشى اۋليەنىڭ جوعارىراق ەكەنىن ايتتى.

مۇحاڭ سوندا ويلانباستان:

-كەتتىك، اۋليەگە،-دەپ كابينانى تارس جاپتى.

اۋليەنىڭ مولاسى جوندەۋسىز، ەبىر-جەسىر بولىپ قۇلاپ تۇرعانىن كورگەن جازۋشى ديرەكتورعا ابدەن كەيىدى. سوزدەن ديرەكتور قورتىندى شىعارىپ، ءبىر اپتادا اۋليەنى جوندەۋدەن وتكىزدى.

كەشكىسىن ۇزاق اڭگىمە بولدى. ءبىز مۇحاڭا ءتۇرلى ساۋالدار قويىپ، جاۋاپ الىپ وتىردىق. سوندا مۇحاڭ:

-وسى سۋىندىقتا جاتقان بالىقشى، يزەندى، ءبايجى، كەڭقول اتانىڭ ءبارى اراب اسكەرىنىڭ قولباسشىلارى، مۇنى مەن كىشكەنە كەزىمدە اتام ومارحاننان ەستىگەنمىن. بالا كەزىندە ءبايجىنىڭ استىندا كەرمە-كەرمە بيە بايلاپ، قىمىز ىشەدى ەكەن. اتامىز وتە ساۋاتتى كىسى بولعاندىقتان، تۇركىستانعا كەلگەن قۇنانباي  ارنايى رۇقساتپەن ءوز ەلى جاققا كەتىپتى،-دەپ وتىراتىن.

سوندا مۇحاڭ بۇل تۇستاعى  اۋليەلەردى بۇرىن كورمەسە دە ءبىلىپ وتىردى.

بالىقشى اتا ودان كەيىن جوندەلگەن جوق. اۋليە اتا قياناتقا  قارسى ادام جانىنىڭ تازالىعىن ساقتايدى.

شايداربەك قاجى ءاشىمۇلىنىڭ «وتكەن ءازيز اۋليەلەر» جيناعىنان

سونداي-اق، وقىڭىز

عازيز قاجى ءامىرحانوۆتىڭ ءومىرى مەن قوعامدىق قىزمەتى

عازيز قاجى ءامىرحانوۆ  كيەلى تورعاي جەرىندە جاس ۇرپاققا بىلىممەن تاربيە بەرۋدە جانە يسلام ءدىنىن ەل …

پىكىر قالدىرۋ

ە-پوشتا مەكەنجايىڭىز جاريالانبايدى. مىندەتتى ورىستەر * تاڭبالانعان