جارىق نۇردىڭ ساۋلەسى

ۇزىن حاسان اتا

زانكي اتانىڭ ءبىرىنشى حالپەسى بىلاي اڭگىمەلەيدى: كامىل ءمۇرشيد ىزدەپ تاشكەنت ولكەسىنە كەلگەندە شولدە ءبىر قالىڭ ەرىندى قارا مالشى ءبىر توپ سيىر باعىپ ءجۇر ەدى. بۇل حازىرەتى زانكي اتا ەدى. ايتۋلارىنشا زانكي اتا باستاپقىدا ءوزىن ەلگە تانىتپاي، بالا-شاعاسىن اسىراۋ ءۇشىن تاشكەنت حالقىنىڭ سيىرىن باعىپ تابىس تاباتىن. اتا حازىرەتى شولدە مال باعىپ ءجۇرىپ ناماز وقىعاننان كەيىن داۋىستاپ زىكىر ەتۋ ادەتى بار ەدى. ول كىسى زىكىر ەتە باستاعاندا مالدار جايىلماي ونى قورشاپ الاتىن. اتا حازىرەتى داۋىستاپ زىكىر ەتۋىن توقتاتپايىنشا مال جايىلماي تۇراتىن.

بۇل تورتەۋى اتا حازىرەتىنىڭ جانىنا باردى. ول جالاڭ اياق اياعىنا ءبىر شوق تىكەندى بايلاپ الىپتى، بۇلارمەن ۇيىنە بارا جاتقاندا ولار الگى تىكەننىڭ اياعىنا مۇلدەم باتپايتىنىن كورەدى. ول كىسىنىڭ اياعىنا ىستىق تا، سۋىق تا اسەر ەتپەيدى ەكەن. جىگىتتەر اتاعا سالەم بەردى. اتا بۇلاردىڭ سالەمىن الىپ، سىزدەر بۇل جاققا قايدان كەلدىڭىزدەر، كىمسىزدەر؟ – دەپ سۇرادى. ولار ءبىز ءىلىم جولىنداعى شاكىرتتەرمىز. بۇحارادا ءتالىم الىپ، حاق جولىنا شاقىرۋ ءۇشىن ول ولكەنى تارك ەتىپ كامىل ءمۇرشيد ىزدەپ ءجۇرمىز، – دەپ جاۋاپ بەردى. سونداي تۇلعانى ىزدەپ الەم ارالاۋعا جولعا شىقتىق، – دەدى. اتا حازىرەتى تۇرا تۇرىڭدار، مەن ءتورت قۇبىلانى ءبىر يىسكەپ كورەيىن. ەگەر ءبىر جاقتان كامىل ءمۇرشيد ءيىسى كەلسە ايتامىن، – دەپ ءتورت تاراپقا مۇرنىن توسىپ يىسكەي باستادى. سودان كەيىن: «بارلىق الەمدى باقىلاپ كوردىم. سىزدەردى كامىلدىك مارتەبەگە جەتكىزۋدە وزىمنەن ارتىق ەشكىمدى تاپپادىم»، – دەدى. اتانىڭ بۇل ءسوزىن ەستىگەن سايد اتا مەن بادر اتا بۇعان يلانبادى. سايد اتا ىشىنەن مەن سايد عالىم بولا تۇرىپ مىنا ءبىر قارا شوپانعا قالايشا ىلەسەمىن، – دەدى. ءبادر اتا دا ىشىنەن وسىلايشا ويلاپ، بۇل ەكەۋى ونىڭ كورىكسىزدىگىن ءمىن سانادى. ۇزىن حاسان اتا مەن ءسادىر اتا زانكي اتانىڭ سوزىنە قۇلاق استى. بۇلار ىشىنەن: «حاق تاعالا بۇل قارانىڭ بويىنا ءبىر نۇرلى امانات قويعان بولۋى كەرەك»; – دەپ ويلادى. زانكي اتا بۇلاردىڭ ارقايسىسىنىڭ ىشىنە ءۇڭىلىپ وزىنە تارتتى. زانكي اتاعا العاش بولىپ كوڭىل قويىپ، دەن بۇرعان ۇزىن حاسان اتا ەدى. ول كامىلدىك دارەجەسىنە دە العاش بولىپ جەتتى.

«راشاحات اين ءال-حايات – تىرشىلىك كوزىنىڭ سىر تامشىلارى» كىتابىنان.
دايىنداعان نۇرلان بەردەنۇلى

تاڭبالار

ۇقساس ماقالالار

پىكىر قالدىرۋ

ە-پوشتا مەكەنجايىڭىز جاريالانبايدى. مىندەتتى ورىستەر * تاڭبالانعان