بىلگەن شايىر ايتادى

ءتۇرسىنالى اينابەكۇلى

ءبىسسىمىللا، دەپ ءسوز باستايىن،

جۇرەكتەن شىققان ءسوزىمدى

ورتاعا جايىپ تاستايىن.

جاراتقان يەم قۇدىرەت

اق جولىڭدى ءناسىپ ەت،

بويىما قۋات دارىتىپ

تىلەگىمدى قابىل ەت.

اقيقاتقا جول نۇسقاپ

تيەگىن اشىپ ءتىلىمنىڭ،

مىناۋ بەيباق قۇلىڭنىڭ

ايتقان ءسوزىن اسىل ەت.

قولداۋشى بولسىن دوسىڭىز

راسۋل-اللا مۇحاممەد،

پايعامباردىڭ دوستارى

ءتورت شاديار اتانعان،

ابۋباكىر، ومار مەن وسمان، ءالي ازىرەت،

جولىنا ساپ بىزدەردى

قولداۋىن اللا ءناسىپ ەت.

جارتى الەمدى ارالاپ

يسلام ءدىنىن تاراتقان،

پايعامباردىڭ تۋىسى،

قوجالاردىڭ باباسى

حانافيا – مۇحاممەد،

ازىرەت ءپىرىم قولداي گور.

سان مىڭداعان ساحابا

قول – باسشىسى قۇتتىقوجا،

تۋ ۇستاۋشى ۋكاشا،

ەرقويان اتا سادۋاقاس،

ساقابا پىرلەر قولداي گور.

اللانىڭ شەرى اتانعان

ازىرەت – اليدەن تاراعان،

مۇسىلماننىڭ پىرلەرى

شاح – ىسقاق-باب، حوراسان.

اۋليە – اتا – قاراحان

يسلام ءدىنىن الىپ كەپ،

ەلىمىزگە تاراتقان

اۋليە بابتار قولداي گور.

قىسىلعاندى جەلەگەن

ايان بەرىپ جەبەگەن،

بابا – تۇكتى – شاشتى – ءازيز

اۋليە بابام قولداي گور.

اللانىڭ ەركە قۇلى ەدى

قىرىق – شىلتەنگە ءپىر بولعان،

رۋحتاردىڭ پاتشاسى

عاۋسىل – اعزام اتانعان،

ابدۋل – قادىر ازىرەت

اۋليە ءپىرىم قولداي گور.

جار بولا گور، يا اللا

جيىلعان وسى قاۋىمعا،

ءلا – ءيللاھا – يلاللا

مۇحاممادا راسۋل – اللا.

ھاق – تاعالام قولداسىن

قىدىر بولسىن جولداسىم،

پەرىشتەلەر قاۋمالاپ

تىلەكشىم بوپ قول جايسىن.

ىبىراحيم – شايىق اۋليە

قولداۋشى بول بىزدەرگە،

ارىستان – باب سالماني

اۋليەلەردىڭ سۇلتانى

قۇل – قوجا – احمەت – ياسساۋي.

سىن ساعاتتا حالىقتى

الىپ قالعان قىرعىننان،

شىنعىسحاندى توقتاتىپ

ۇرپاعىنا ءپىر بولعان،

ءياسساۋيدىڭ اعاسى

سادىرشايىح بالاسى،

زارنۋھي – اۋليە – دانىشپان

ازىرەت پىرلەر قولداي گور.

تاريحات جولىن ۇستاعان

عۇلامالار ءىلىمدى:

سادىرشايىح، زەڭگى – اتا

باحاۋاددين، قۇسشى – اتا،

ماۋلانايى – سافياددين

تىلەۋلى – اتا زاحياددين،

ىبرايىمشايح – قاۋعاني

بۇرحانشايىح، وقشى – اتا،

ۇسەنشايىح، باقسايىس

سۋناق اتا، القوجا،

بايمەنقوجا، ايقوجا

شەراحان اتا اۋليە،

قاراشايىح بابالار

دۇعاسىمەن قورعاسا.

العا باسار ءىسىمىز

اۋليە پىرلەر قولداسا،

تىلەسەڭ، اللا جار بولار

تىلەگىمدى قابىل ال.

تۋرا جولدان تايعاندار

كۇنىنە كورگەن زار بولار،

كومەك بەرسىن بىزدەرگە

جاتقان قازاق جەرىندە،

اللانىڭ سۇيگەن قۇلدارى

ءۇش – ءجۇز الپىس اۋليە.

شاراپاتىن تيگىزسىن

جينالىپ كەلگەن بارىڭە،

تالاي ناۋقاس جانداردى

داۋاسىز دەرتتەن قۇتقارعان،

ءبىر اللاعا سيىنىپ

شيپا سۇراپ تىلەيىك

ازىرەتى حاكىم لۇھماننان.

پايعامباردىڭ اۋلەتى

ازىرەتى ءالي ۇرپاعىن،

شاريعاتتىڭ زاڭىندا

ءدىن ەگەسى قوجا دەپ،

مۇسىلماندار ءپىر تۇتقان.

ءبىر اللاعا سىيىنىپ

پىرلەرىنە باس ءيىپ،

اسانقايعى بابامىز

جەر ۇيىقتى ىزدەگەن.

قورقىت – اتا قوبىزبەن

كۇڭىرەنتىپ كۇي توككەن،

قوبىلاندى، الپامىس

سەيداق – باتىر،

جاس – ساۋران.

اقساق تەمىر كورەگەن

قارا – كەرەي قابانباي،

قانجىعالى بوگەنباي

رايىمبەك پەن قاراساي،

البان، قاپال، سىپاتاي

شاپىراشتى – ناۋرىزباي،

كورەگەن حان ابىلاي

ەر – ءجالاڭتوس – ءباحادۇر،

وتەگەن، ەسەت، بايعوزى

بۇحارباي مەن اعىباي،

جانىبەك، تارحان، ەرتولەك

كەنەسارى، ناۋرىزباي،

قارابۋرا، جانقوجا

جاقىپ باتىر، ەركوكەن،

جاۋدان ەلىن قورعاعان

قىسىلعاندا جاندارى،

ازىرەتى ءالي ءپىرىم دەپ

اللاادان مەدەت سۇراعان.

تولە، قازبەك، ايتەكە

ەل بىرلىگىن قولداعان،

بۇحار جىراۋ قازتۋعان

اقتامبەردى، دوسپانبەت

جىردان داۋىل تۇرعىزعان.

ءماشھۇر، ءجۇسىپ، شاكارىم

كەنەن، جامبىل، ءسۇيىنباي

ەلدىڭ مۇڭىن جىرلاعان،

ءال – فارابي دۋلاتي

بابا – ماشىن سۇلەيمەن،

حاكىم، اباي، قۇنانباي

بەكەت – اتا، بايدىبەك،

بايدالى – بي، بايانباي

مەيرام سوپى اق – يشان،

مارال – يشان، قۇلبولدى

ارقالى باقسى قويلىباي،

ايتجان-اتا دامۋللا

تاشمۇحاممەد قاجىلار،

اۋباكىر قارىلار

كامال اۋليە – قارى-اتا،

قوسىم يشان اۋليە

ءمۇسىرالى اۋليە،

پىرلەرىنە قول بەرىپ

شاريعات جولىن ۇستاعان،

بابالارىم قولداي گور.

وڭتۇستىك پەن سولتۇستىك

باتىس، شىعىس وڭىردە،

جاتىر تالاي بابالار

قورعان بولعان ەلىنە،

ارقالى تۋعان باتىرلار.

دۋالى اۋىز بيلەرىم،

وراق ءتىستى اقىندار،

جىراۋمەنەن جىرشىلار

رۋحىڭمەنەن جەبەي گور.

جاراتقان اللا جار بولىپ

تۋرا جولدان تايدىرما،

ىبىلىسپەن جولداس قىپ

اينالدىرما ازعىنعا.

اداستىرىپ اق جولدان

يمانسىز ەتىپ قالدىرما،

ھاق جولىڭدى سىلتەي گور

اداسىپ جۇرگەن قاۋىمعا.

بابالار سالعان سارا جول

يمام – اعزام ءماسھابى،

حالقىمنىڭ سالت – ءداستۇرىن

شاريعاتپەن ۇشتادى.

اسىل تەكتى اتالار

ءدىنىن بەرىك ۇستادى،

امانات ەتىپ ۇرپاققا

تۋرا جولدى نۇسقادى.

ارادا جىلدار وتكەندە

قاتتى باتتى جانىما،

زامانانىڭ قىسپاعى

اتا جولدان اداستىق.

وسى ەمەي نەمەنە

باستان باقتىڭ ۇشقانى،

جولىن تاپپاي شاتاسىپ

حالقىم كەتتى اداسىپ.

الدامشىلار كوبەيدى

اۋليەمىن دەپ تالاسىپ،

سەڭ سوققانداي سەندەلىپ

اتا جولىن ۇمىتتى.

تەرىس جولعا بۇرىلىپ

كورىنگەندى ءپىر تۇتتى،

ايەل دە پىرگە اينالىپ

مازار باسىن شۋ قىلىپ

مازالادى رۋحتى.

جۇرەكتەن شىققان سوزدەردىڭ

ءبارىن تۋرا ساناما،

جىن ءسوزى مە، كىم ءسوزى

ونى دا ويمەن سارالا.

كاليما ايتىپ اۋەلى

ءوزىڭدى ءوزىڭ تازالا،

اۋليە كىرسە تۇسىڭە

كورىنگەندى ءپىر تۇتپا.

اۋليەلەردى قۇرمەتتەپ

ۇرپاعىن ىزدەپ جاعالا،

باتاسىن الىپ ءپىر تۇتساڭ،

قولدايدى سەنى ءبىر اللا.

جولدان تايىپ كەتسەڭدەر

يمانسىزدىق ەتسەڭدەر،

جەتەگىندە شايتاننىڭ

قالارسىڭ ءبىر كۇن دالادا.

پىرسىزدەرگە ءپىر شايتان

بولماس وندا ەش يمان،

تالاي جاندى ازعىرىپ

دۇرىس جولدان تايدىرعان.

ساقتاسىن اللا ساقتاسىن

جىن – شايتاننىڭ كارىنەن،

قىرىق ساققا بولىنگەن

جالعان ءدىننىڭ بارىنەن.

ءدىننىڭ جولىن ۇستانعان

جالعان پىرلەر كوبەيسە،

ءدىن بولىنەر سان-ساققا،

دۇرىس جولدان اداسىپ

كەتەر حالىق جان-جاققا.

ەي، جينالعان قالايىق

وتكەنگە كوز سالايىق،

سوزىنە ەرمەي اركىمنىڭ

شىندىققا تۋرا قارايىق.

سان عاسىردان جالعاسقان

اتا سالتىن بۇزبايىق،

بۇرىنعى وتكەن بابالار

قادىر تۇتىپ ءداستۇردى،

اۋليەلەردى قۇرمەتتەپ

ۇرپاقتارىن قادىرلەپ،

ءدىن ەگەسى قوجا، دەپ

پىرگە قولىن تاپسىردى.

ءدىن ەگەسى، ءپىرىڭ بولسا قاسىڭدا

ھاق جولىنان بارىنشا

اداسپايسىڭ راسىندا،

پىرلەردىڭ دە، ءپىرى بار

كيەسى مەن قۇپيالى سىرى بار،

دەپ ايتىلعان ىلگەرىدەن

حالقىمىزدىڭ سالتىندا.

كۇيشى اتاسى دەگەن بار،

جىرشى اتاسى دەگەن بار،

كۇي مەن جىردىڭ يەسىن

پىرگە تەڭەپ ايتپاعان.

ءپىردىڭ سىرىن بىلمەگەن

ناعىز ءپىرىن تانىماس،

ءپىر، دەپ ايتقان حالقىمىز

قاسيەتتى قۇرانمەن

ءدىننىڭ عانا ەگەسىن.

ءدىن جولىندا عۇلامالار ءبىلىمدى

ۇستازدارىن، حازىرەتى–پىر، دەيدى،

ھاق يسلام شاريعاتى زاڭىندا

ازىرەتى ءالي اۋلەتىنەن شىقپاعان

ناعىز ءپىردىڭ ساناتىنا كىرمەيدى.

دەپ ايتىپتى،

ءدىن-يسلام پايعامبار.

پارىز بولدى مۇسىلمانعا ايتقاندارى

ءبىر اللاعا سىيىنعان،

اسىل تەكتى حالقىمىز

ءدىن يسلامعا جات ەمەس.

اتا ءداستۇر سالتىمىز

اتا جولىن ىزدەسەڭ،

ءدىن يسلام ھاق جولى،

وسى جولدان اينىما

بولار ساعان باق جولى.

ءدىن ەگەسى مۇستافا-

راسۇل – اللا مۇحاممەد،

قورعاۋشىسى قۇراننىڭ

اللانىڭ شەرى اتانعان،

الەمگە ءدىندى تاراتقان

شاديار ءالي ازىرەت.

ھاق جولىندا ءپىرىمىز

ازىرەتى مۇحاممەد- حانافيا ۇرپاعى،

قوجالاردىڭ بارشاسى

كۇنگە دەيىن قيامەت،

جاراتقان يەم جار بولىپ

تۇركى تىلدەس حالقىما

وسىنى لايىم ءناسىپ ەت.

 

دايىنداعان سەيت ومار ساتتارۇلى

              

 

 

 

تاڭبالار

ۇقساس ماقالالار

پىكىر قالدىرۋ

ە-پوشتا مەكەنجايىڭىز جاريالانبايدى. مىندەتتى ورىستەر * تاڭبالانعان