Кітапханада әдебиеттанушы, ғалым Әсілхан Оспанұлының туғанына 100 жыл толуына арналған еске алу кеші мен Кеңес Одағының батыры, генерал Сабыр Рақымов туралы жазған «Қазығұрт қыраны генерал Сабыр Рақымов» атты жаңа кітаптың тұсаукесері өткізілді.
Кешке батыр туып өскен Қазығұрт ауданы Көкібелі ауылынан туыстары, ҚР Қорғаныс министрлігі С.Рақымов атындағы Әскери колледж ұландары мен мектептердің ұстаздары мен оқушылары, суретші, этнограф Ә.Оспанұлының ұлы Ералы Оспанов, Қарулы күштерінің ардагерлері, қалалық ардагерлер кеңесі, Ауған соғыс ардагерлері, Желтоқсаншылар, Семей полигоны ардагерлері, Б.Момышұлы атындағы оқу орталығының басшылығы, № 35748 әскери бөлімінің әскери оркестр қызметкерлері, ақын-жазушылар, журналистер, қаламыздағы жоғары және арнаулы оқу орындарының ұстаздары мен студенттері қатысты.
Іс-шараға Ө.Жәнібеков атындағы ОҚПУнің т.ғ.к., доценті Қ.Сапарханұлы модеротрлық етті. Кеш ҚР әнұранымен басталып, Оңтүстіктің жыр сүлейлері Майлықожа, Мәделіқожа, тағы басқа да ақиық ақындардың шығармаларын жарыққа шығарған, генерал С.Рақымовты зерттеуге бүкіл саналы ғұмырын арнаған ғалым, қоғам қайраткері, журналист, ғалым ұлтжанды азамат Ә.Оспанұлының еңбегі мен елдігі жайында естеліктер айтылды. Жаңа кітаптың тұсауы кесіліп, батырдың әскери ерлігі туралы деректер мен дәйектер әңгімеленді. С.Рақымов атындағы мектептерден келген оқушылар генерал туралы өлеңдерін оқып, № 35748 әскери бөлімінің оркестрі музыкалық шығармалар орындап, «Тәуелсіздік» әніне қонақтар тіке тұрып ырзашылық білдірді. Ә.Қастеев атындағы өнер және дизайн колледжінің студенттері генерал С.Рахымовтың келбетін сол кеште бейнелеп, батыр атындағы мектептерге табыстады.
