شورتانباي ء(الي مۇحاممەد) قانايۇلى

شورتانباي اقىننىڭ حان كەنەگە ايتقانى

جىراۋدىڭ جاڭا ولەڭى تابىلدى

بۇل ولەڭنىڭ ايتىلعانىن ءبىلىپ جۇرگەنبىز. جازۋشى ءسابيت مۇقانوۆتىڭ ايتۋىنشا كەنەسارىعا بايلانىستى ارحيۆتا، 1837 جىلى شورتانبايدى، كەنەسارى ۇستاپ الىپ، شورتانباي جىر ايتقان سوڭ، بوساتتى دەگەن ماتەريال بار. بىراق  قاي ولەڭ ەكەنىن بىلمەۋشى ەدىك. سيرەك قولجازبالار قورىنان -1338-پاپكا دا مىنا ولەڭدى تاۋىپ الىپ، كەنەنىڭ قاھارىن جىبىتكەن مىنا جولدار وسى دەپ ويلايمىز.

 

شورتانباي اقىنىڭ كەنەسارىعا ايتقانى

 

سارى اتتىڭ وق ءتيىپتى جىلىگىنەن،

باتىردىڭ ساۋعا الالىق ىلىگىنەن.

تۋ ۇستاپ زامانىڭدا ءمىندىڭ تۇلپار،

قاسىمنىڭ اينالايىن سىدىگىنەن.

 

كەنە اعا جازدا اۋىلمىن، كۇزدە اۋىلمىن،

قايتارماي سالساڭ تۇيعىن، جەز دابىلمىن.

اسپاندا ۇشىپ جۇرگەن ءسىز بيدايىق،

الدىڭدا الا مويىن قىرعاۋىلمىن.

 

جاراسقان جايلاۋىڭا سالقىن سازبىن،

قالقىمنان ءتىلىم مۇكىس، ءوزىم ازبىن.

اسپاندا ۇشىپ جۇرگەن ءسىز  اقتۇيعىن،

الدىڭدا الا مويىن قوڭىر قازبىن،

-دەگەندە تۇكسۇيىپ وتىرعان حاننىڭ ءجۇزى جىلىپتى.

كەنە-اعا ات بەرە گور ايعانداي عىپ،

ۇيىمە امان-ەسەن بارعانداي عىپ.

كەنە-اعا ات بەرگىزسەڭ ارعىماق بەر،

قىزىعىپ كورگەن كىسى تالعانداي عىپ.

مۇنى ايتقان ماقسۇت نارىمبەتۇلى.

ول كىسى ءوز ايتۋىندا مۇنى سىرتقى دادان توبىقتى ىشىندەگى تولعانباي دەگەن شالدان ەسىتتىم دەدى.

بۇل ولەڭنىڭ ايتىلۋ ءمانىسى شورتانباي جامانتايعا تۇراقتاپ سونىڭ جىرشىسى بولىپ، كەنەسارىنىڭ قولىنا ەرمەگەن بولسا كەرەك. سودان ءبىر رەت كەنەسارىنىڭ ادامدارىنا كەزدەسىپ،سولار ۇستاپ كەنەگە الىپ كەلىپتى. كەنە ءتىل قاتپاي زارلەنىپ وتىرىپ العاندا العاشقى ءۇش اۋىز ولەڭدى ايتىپتى دەيدى.

سيرەك قولجازبالار قورى -1338-پاپكا، دايىنداعان سەيت ومار ساتتارۇلى.

 

 

 

تاڭبالار

ۇقساس ماقالالار

پىكىر قالدىرۋ

ە-پوشتا مەكەنجايىڭىز جاريالانبايدى. مىندەتتى ورىستەر * تاڭبالانعان