Қожатоғайдағы Майлықожа термелері фестивалі
Түркістан облыстық мәдениет басқармасының жоспарына орай үстіміздегі жылдың 3-і шілдесінде Арыс қаласының «Қожатоғай» ауылында «ҚОҢЫР ҚОНЫС – ҚАСТЕРЛІ МЕКЕН» атты Майлықожа Сұлтанқожаұлының жыр-термелер фестивалі болып өтті.
Арыс қаласы Қожатоғай ауылы, мәдениет үйінің қызметкері – Сәдуақас Каукешовтің ұйымдастыруы, демеушілердің, сондай-ақ ауыл әкімдігінің қолдауымен өткен Майлықожа атамыздың жыр-терме фестивалі Ұлы бабаның жерлестері үшін үлкен мәдени мейрам болды.
Аллаға шексіз шүкір, соңғы жылдары Майлықожа Сұлтанқожаұлының шығармалары – жырлары мен арнаулары, термелері мен өлеңдерінің кештері жиі өткізіле бастады.
Жыр кешіне арнайы шығарылған билеттерді демеуші жігіттер сатып алып, ауылдастарына сыйға тартты.
Қожатоғай ауылының әкімі – Зәкірқожа Елшібаев, Сарыағаш ауданынындағы Қожалар қауымдастығының төрағасы – Бөкейхан Ақбердиев, сондай-ақ ауыл ақсақалдары жыр-терме фестивалін ашып, қатысушыларға шабыт тіледі.
Майлықожа мирасын зерттеуші, Ұлы бабамыздың академиялық басылымының авторы – Сейтомар Саттаровтың жүрек жарды аудио құттықтауы Фестиваль қатынасшылары мен ауыл тұрғындарына жеткізілді.
Терме кешін Түркістан облыстық мәдениет және халық шығармашылығы орталығының ұлттық жанрлар жөніндегі маманы, Халықаралық «Жыршы-термешілер» одағының мүшесі, «Ұлттық өнер жанашыры», ұстаз – Аязбек Рүстемов жүргізіп отырды.
Алматы қаласынан туған ауылындағы терме фестиваліне арнайы келген Философия ғылымдарының кандидаты, Қазақстан Республикасының Өнер қайраткері, айтыс өнерінің өкілі, ақын, сазгер, термеші – Жакен Омаров Майлықожа бабамыздың «Ата-ананың қадірі» термесін орындап, тыңдарманның алғысына бөленді.
Арыс қаласы Қожатоғай ауылы, мәдениет үйінің қызметкері – Сәдуақас Каукешов Майлықожа ақынның «Ақ пен қара» термесін орындады.
Еліміздің түрлі облыс және аудандарынан келген термешілер ауыл тұрғындарына тамаша көңіл-күй сыйлады.
Фестиваль қатынасшыларына алғыс хаттар мен қаржылай сыйлықтар табыс етілді.
«МАЙЛЫҚОЖА – ӘУЛИЕ АҚЫН»
Жобасының авторы – Үсен Асқаров
