بىلگەن شايىر ايتادى

قالدىبايقوجا مەن شوجەنىڭ ايتىسى

قالدىبايقوجا

اي، شوجە، شىندايمىسىڭ وينايمىسىڭ،

بەرسەدە تامام مەيرام تويمايمىسىڭ.

وتىرعان قاسىڭداعى قوجاڭ ەدىم،

ءبىر كىسى الماعىما قويمايمىسىڭ.

 

شوجە

كوشكەن ەل سازدى جەرگە قونباي ما ەكەن؟

قازاقتان قوجا ءپىديا الماي ما ەكەن؟

سول داۋلەت قۇداي بەرگەن تاۋسىلار ما،

ەكەۋمىز ءبولىپ الساق بولماي ما ەكەن؟

 

قالدىبايقوجا

سوقىر سەننەن باسقادا ءتىل بار ما ەكەن؟

سويلەر سوزگە سوقىرلار ءدىلمار ما ەكەن؟

ءبىر سوقىر مەن ءبىر اقساق ۇيلەسىپ اپ،

اقى يەسى قۇر قالماق جول بارما ەكەن؟

 

شوجە

قوجادا دا قوجا بار، ءدىندار قوجام،

الدىڭدا سايراپ تۇرعان جول بار قوجام.

قوجا بولساڭ ءپىر بولىپ ءدىن ۇيرەتپەي،

قازاقتىڭ ولەڭىندە نەڭ بار قوجام؟

 

قالدىبايقوجا

قىرعىزدا دا قىرعىز بار ءدىندار قىرعىز،

سەنىڭ ءتۇبىڭ بەلگىلى ماردار قىرعىز.

سۇيەگىم قوجا-داعى ەتىم قازاق،

قازاعىمنىڭ ىشىندە نەڭ بار قىرعىز؟

 

شوجە

مەن قۇدايدان تىلەيمىن دىنگە ساۋلىق،

جالعان سويلەپ قاپىدا قىلما جاۋلىق.

قوجا، قوجا دەگەنگە قوقيلانبا،

قوجا ءتۇبى سارت ەكەن وگىز تاۋلىق.

 

قالدىبايقوجا

بۇركىت سالعان شىعادى زاڭعار تاۋعا،

ويناپ كۇلگەن جاقسى ەكەن دەنىڭ ساۋدا.

جەر، جەرىن جەكەن ءسۇيىپ تابار دەگەن،

سوقىر قىرعىز كەتسەڭشى الاتاۋعا.

 

شوجە

قوجانىڭ وزىمە قوي جالعىز ءوزىن،

شوجەنىڭ كىم كەمىتپەس ەكى كوزىن.

قوجا بولساڭ ساتىلماي كورىنگەنگە،

بۇل جۇرتقا ۇقتىرساڭشى ءدىننىڭ ءسوزىن.

 

قالدىبايقوجا

جاماندىق ويلاي، ويلاي كوزىڭ شىقتى،

كوزىڭ سوقىر بولسادا كەۋدەڭ مىقتى.

قۇداي ءسوزىن ايت دەسەڭ مەن ايتايىن،

دايار بوپ ءزامزام سۋى قايدان شىقتى؟

 

شوجە

قوجا بولىپ قالار-اۋ كوكشەسىنەن،

كوپ شوشيمىن ءسوزىڭنىڭ تىكشەسىنەن.

اجار اپا تولعاتىپ قينالعاندا،

ءزامزام شىققان تەبىنگەن وكشەسىنەن.

 

قالدىبايقوجا

سۋ شىققان جوق اجاردىڭ وكشەسىنەن،

سەن شوشىما ءسوزىمنىڭ تىكشەسىنەن.

اجار اپا سۋ ىزدەپ جۇگىرگەندە،

ءزامزام شىققان سماعۋل وكشەسىنەن.

 

شوجە

قوجەكە قوجامىسىڭ قارا مىسىڭ،

تالاسىپ بولماس ىسكە بارامىسىڭ.

ءازىز قوجا حان قوجا، اقىن قوجا،

تالاسىپ حان قوجاعا بارامىسىڭ.

 

قالدىبايقوجا

سوقىر شوجە مىنگەنىڭ تەڭبىل شۇبار،

مەنىمەنەن تالاسىپ تەرىڭ شىعار.

بارساڭ بار قوجالىقتى حان قوجاعا،

ولدا وزىمدەي وقىعان قوجا شىعار.

 

شوجە

سەننەن باسقا وقىعان قوجا جوق پا؟

سەننەن باسقا دۇنيەدە سوققان جوق پا؟

ماريام انا يساعا تولعاتقاندا،

تابانىنان اعار سۋ شىققان جوقپا؟

 

قالدىبايقوجا

سەن سوقىر، سەن مۇگەدەك، مەن ءبىر اقساق،

سەننەن گورى بالەم كوپ مەنى قازساق.

شاريعاتتىڭ سوزىنەن بىلەرىڭ جوق،

قۇر دالادا ويبايلاپ جۇرگەن قاقساپ.

ەكەۋى جەڭىسە الماي تارقاسادى.

سيرەك قولجازبا قورى 19-پاپكا. لاتىن حارپىنەن اۋدارعان سەيت-ومار ساتتارۇلى

 

 

 

 

 

تاڭبالار

ۇقساس ماقالالار

پىكىر قالدىرۋ

ە-پوشتا مەكەنجايىڭىز جاريالانبايدى. مىندەتتى ورىستەر * تاڭبالانعان

Жабу